நெல்லை மாவட்டம் கூடங்குளம் அருகே உள்ள புல்லமங்கலம் கிராமத்தைச் சேர்ந்த முருகன், இசக்கி முத்து ஆகிய இரு இளைஞர்கள் குடிபோதையில் அருகில் உள்ள வேப்பன்பாடு என்ற கிராமத்திற்கு சென்று உள்ளனர்.
அங்கு தங்களுடன் பள்ளியில் படித்த பழைய நண்பனான பொன்ராஜை பார்த்துள்ளனர். பள்ளி காலத்தில் பொன்ராஜுடன் ஏற்பட்ட தகராறை தற்போது ஞாபகப்படுத்தி அவரிடம் வாக்குவாதத்தில் ஈடுபட்டு தாக்கியுள்ளனர்.
இதனை கண்ட வேப்பன்பாடு கிராம மக்கள் ஒன்று சேர்ந்து, தகராறில் ஈடுபட்ட இரு இளைஞர்களையும் ஊரில் உள்ள கோவிலில் கட்டிவைத்து கூடன்குளம் காவல் நிலையத்திற்கு தகவல் கொடுத்துள்ளனர்.
தகவலின் அடிப்படையில் கூடங்குளம் போலீசார் இரு இளைஞர்களையும் மீட்டு சென்று விசாரணை நடத்தியுள்ளனர். பின்னர் நேற்று வேப்பம்பட்டு கிராமத்தை சேர்ந்த மூன்று இளைஞர்கள் விவசாய வேலை செய்வதற்காக புல்லமங்கலம் ஊர் வழியாக சென்றுள்ளனர்.
அவர்களை வழிமறித்த புல்லமங்கலத்தைச் சேர்ந்த இளைஞர்கள் மற்றும் பொதுமக்கள், மூன்று இளைஞர்களையும் சாதி பெயரை சொல்லி திட்டி மின் விளக்கு கம்பத்தில் கட்டிவைத்து அடித்துள்ளனர்.
இந்த சம்பவம் வேப்பம்பாடு கிராம மக்களுக்கு தெரியவர, கூடங்குளம் காவல் நிலையத்திற்கு தகவல் கொடுத்து மூன்று இளைஞர்களையும் மீட்க சென்றுள்ளனர். ஆனால் போலீசார் கட்டிவைத்து அடித்தவர்களை கைது செய்யாமல் மின் கம்பத்தில் கட்டி வைக்கப்பட்ட 3 பேரையும் போலீஸ் வாகனத்தில் ஏற்ற முற்பட்டுள்ளனர்.
இதற்கு வேப்பம்பட்டு கிராம மக்கள் எதிர்ப்பு தெரிவித்து தர்ணா போராட்டத்தில் ஈடுபட்டனர். பின்னர் சம்பவ இடத்திற்கு ராதாபுரம் தாசில்தார் செல்வன் மற்றும் வள்ளியூர் காவல்துறை துணை கண்காணிப்பாளர் ஹரிஹரன் பிரசாத் ஆகியோர் பொதுமக்களிடம் பேச்சுவார்த்தை நடத்தினர்.
அதன் பின்னர் 3 இளைஞர்களையும் கட்டி வைத்து அடித்த புல்லமங்கலத்தைச் சேர்ந்த 5 பெண்கள் உட்பட 12 பேர் மீது வன்கொடுமை தடுப்பு சட்டத்தின் கீழ் வழக்கு பதிவு செய்யப்பட்டது. இதில் கிராம நிர்வாக அதிகாரி ஒருவரின் தந்தையும் அவரது தம்பியும் இவ்வழக்கில் சேர்க்கப்பட்டுள்ளனர். மேலும் தர்ணா போராட்டத்தில் ஈடுபட்டதாக வேப்பன்பாடு கிராமத்தை சேர்ந்த மக்கள் என இந்த விவகாரத்தில் 27 பேர் மீது வழக்கு பதிவு செய்யப்பட்டுள்ளது.
