நாடு முழுவதும் பெட்ரோல், டீசல் விலையை எண்ணெய் நிறுவனங்களின் கூட்டமைப்பு தினமும் மாற்றி அமைத்து வருகிறது. சர்வதேச சந்தையில் கச்சா எண்ணெய் விலை, இறக்குமதி செலவு, அமெரிக்க டாலருக்கு நிகராக இந்திய ரூபாயின் மதிப்பு ஆகியவற்றை கணக்கில் கொண்டு இதன் விலையில் மாற்றம் செய்யப்படுகிறது. உலகம் முழுவதும் பரவிய கொரோனா வைரஸ் தாக்கத்தால்,கச்சா எண்ணெய் விலை கடந்த பிப்ரவரி, மார்ச், ஏப்ரல், மே மாதங்களில் வெகுவாக குறைந்தது. ஒரு பீப்பாய் கச்சா எண்ணெய் 15 டாலர் என்ற நிலைக்கும் கீழ் சரிந்து வந்தது.
ஆனால், கச்சா எண்ணெய் விலை மீண்டும் அதிகரிக்கத் தொடங்கியது. இதனால், பெட்ரோல், டீசல் விலையை எண்ணெய் நிறுவனங்கள் தொடர்ந்து உயர்த்தி வந்தது. இதன்படி, கடந்த ஜூன் மாதம் 7-ம் தேதியில் இருந்து 21 நாட்களாக பெட்ரோல், டீசல் விலையை எண்ணெய் நிறுவனங்கள் உயர்த்தி வந்தது. தொடர்ந்து, அடுத்த 13 நாட்களாக பெட்ரோல், டீசல், விலையில் மாற்றமின்றி விற்பனை செய்யப்பட்டது. இதற்கிடையே, கடந்த ஜூலை 7-ம் தேதி டீசல் விலை லிட்டருக்கு, 19 காசுகள் உயர்ந்து, 77.91 ரூபாயாக அதிகரித்தது. அதேசமயம், பெட்ரோல் விலையில் மாற்றமில்லாமல், 83.63 ரூபாய்க்கு விற்பனையானது.
தொடர்ச்சியாக, ஜூலை 12 மற்றும் 13-ம் தேதி டீசல் லிட்டருக்கு,10 காசுகள் உயர்ந்தது. பின் 14-ம் தேதி மாற்றமில்லாமல் 15-ம் தேதி 11 காசு உயர்ந்தது. 16-ம் தேதி விலை மாற்றமில்லாத நிலையில், 17 மற்றும் 18-ம் தேதி உயர்ந்தது. 19-ம் தேதி பெட்ரோல், டீசல் விலையில் மாற்றமில்லாத நிலையில், 20-ம் தேதி 10 காசுகள் அதிகரித்தது. ஆனால், 21-ம் தேதி முதல் 24-ம் தேதி வரை 4 நாட்களாக விலை உயரவில்லை. ஆனால், கடந்த 25 மற்றும் 26-ம் தேதி உயர்ந்தது.
தொடர்ந்து, கடந்த 27-ம் தேதி முதல் ஆகஸட் 15-ம் தேதி வரை 21 நாட்களாக டீசல் விலை மாற்றமில்லாமல் விற்பனையாகியது. இந்நிலையில், கடந்த 48 நாட்களாக மாற்றமில்லாமல் இருந்த பெட்ரோல் விலை நேற்று லிட்டருக்கு 12 காசுகள் உயர்ந்தது. தொடர்ந்து இன்றும் 2-வது நாளாக பெட்ரோல் விலை 12 காசுகள் உயர்ந்துள்ளது. சென்னையில் இன்று ஒரு லிட்டர் பெட்ரோல் ரூ.83.87-க்கும், டீசல் ரூ.78.86-க்கும் விற்கப்படுகிறது. கடந்த ஜூன் 7-ம் தேதி முதல் லிட்டருக்கு பெட்ரோல் ரூ.8.33ம், டீசல் ரூ.10.74ம் உயர்ந்துள்ளது குறிப்பிடத்தக்கது.
