ராஜஸ்தான் மாநிலத்தில் அசோக் கெலாட் தலைமையிலான காங்கிரஸ் ஆட்சி நடைபெற்று வருகிறது. இந்த சூழலில் நீண்ட கால அதிருப்தியால் துணை முதலமைச்சர் சச்சின் பைலட் தனது ஆதரவு எம்.எல்.ஏக்களுடன் போர்க்கொடி உயர்த்தினார். அசோக் கெலாட் அரசை மைனாரிட்டி என்று கூறி சர்ச்சையை ஏற்படுத்தினார். உடனே காங்கிரஸ் எம்.எல்.ஏக்கள் கூட்டத்தை கூட்டி தனது பெரும்பான்மையை அசோக் கெலாட் உறுதிப்படுத்திக் கொண்டார். அதேசமயம் காங்கிரஸ் ஆட்சியை கவிழ்க்க பாஜக சதி செய்து வருகிறது. இதற்காக எங்கள் கட்சி எம்.எல்.ஏக்களிடம் குதிரை பேரம் நடத்தி வருவதாக முதலமைச்சர் அசோக் கெலாட் குற்றம்சாட்டினார்.
இதுதொடர்பாக காங்கிரஸ் கட்சி தலைமைக் கொறடா முகேஷ் ஜோஷி போலீசில் புகார் அளிக்க விசாரணை முடுக்கிவிடப்பட்டது. அதில் சஞ்சங் ஜெய்ன் என்பவரை போலீசார் கைது செய்து விசாரித்து வருகின்றனர். இந்நிலையில் பாஜக மத்திய அமைச்சர் கஜேந்திர சிங் உடன் காங்கிரஸ் அதிருப்தி எம்.எல்.ஏ பன்வார்லால் ஷர்மா ராஜஸ்தான் மாநில ஆட்சியை கவிழ்ப்பது குறித்து பேசியதாக ஆடியோ டேப் ஒன்று வெளியானது.
இது பலரையும் அதிர்ச்சியில் ஆழ்த்தியது. மாநிலம் முழுவதும் பெரும் புயலை கிளப்பியது. இதையடுத்து விஷயம் தேசிய அளவில் அதிக கவனம் பெறத் தொடங்கியுள்ளது. இதுதொடர்பாகவும் காங்கிரஸ் தலைமை கொறடா போலீசில் புகார் அளித்தார். அதன்படி ஆட்சியை கவிழ்க்க சதி மற்றும் சர்ச்சைக்குரிய ஆடியோ டேப் என இரண்டு வழக்குகள் பதிவு செய்யப்பட்டுள்ளன. இந்த விவகாரத்தில் அசோக் சிங் மற்றும் பாரத் மலானி மீது குற்றம்சாட்டப்பட்டுள்ளது. ஆனால் அவர்கள் குரல் பரிசோதனைக்கு மறுப்பதாக கூறப்படுகிறது. இந்த சூழலில் இரு வழக்குகளையும் விசாரிக்க 8 பேர் கொண்ட சிறப்பு அதிகாரிகள் குழுவை ராஜஸ்தான் அரசு அமைத்தது. சச்சின் பைலட் தனது ஆதரவு எம்.எல்.ஏக்கள் உடன் ஹரியானாவில் உள்ள தனியார் ஓட்டலில் தங்கியுள்ளார்.
இந்நிலையில் ஆடியோ விவகாரம் குறித்து ஹரியானா ஓட்டலிற்கு விசாரிக்க சென்ற ராஜஸ்தான் போலீசாருக்கு அம்மாநில போலீசார் அனுமதி மறுத்ததால் பெரும் பரபரப்பு ஏற்பட்டது. இதனால் எம்.எல்.ஏக்களை சந்திக்காமலேயே ஏமாற்றத்துடன் போலீசார் திரும்பினர். இந்த சூழலில் ஆட்சியை கவிழ்க்கும் சதியில் ஈடுபட்டதால் மத்திய அமைச்சர் பதவியை வகிக்க கஜேந்திர சிங்கிற்கு எந்த உரிமையும் இல்லை. உடனே அவர் பதவி விலக வேண்டும் என்று காங்கிரஸ் மூத்த தலைவர்கள் வலியுறுத்தியுள்ளனர்.
