ஆந்திர மாநிலம், குண்டூர் அருகே கொரோனா தொற்று காரணமாக சாலையில் மயங்கி விழுந்து மரணம் அடைந்த நபரின் உடலை இரண்டு மணி நேரம் கழித்து நகராட்சி ஊழியர்கள் அப்புறப்படுத்திய சம்பவம் பெரும் அதிர்ச்சியை ஏற்படுத்தியுள்ளது.
குண்டூர் மாவட்டத்தில் உள்ள சத்தனப்பள்ளி வாவிலால் வீதியை சேர்ந்த ஒருவருக்கு கொரோனா தொற்று ஏற்பட்டு சிகிச்சைக்காக மருத்துவமனைக்கு செல்ல இருந்தார். அவரை அழைத்து செல்ல சரியான நேரத்தில் ஆம்புலன்ஸ் வராத காரணத்தால் ஆட்டோ ஒன்றில் ஏறி மருத்துவமனைக்கு செல்ல முயன்றுள்ளார்.
அவருக்கு கொரோனா தொற்று இருப்பதை தெரிந்து கொண்ட ஆட்டோ டிரைவர் தன்னுடைய ஆட்டோவில் அவரை ஏற்றிச் செல்ல மறுத்து சென்றுவிட்டதாக தெரிகிறது. இந்த நிலையில் அவர் அதே இடத்தில் சாலையில் மயங்கி விழுந்து பரிதாபமாக மரணமடைந்தார். கொரோனா தொற்றுக்கு உள்ளான நபர் சாலையில் இறந்து கிடப்பது பற்றி அந்த பகுதி மக்கள் அதிகாரிகளுக்கு தகவல் அளித்தனர். ஆனால் இரண்டு மணி நேரம் கழித்த பின் அங்கு வந்து சேர்ந்த நகராட்சி ஊழியர்கள் அவரின் உடலை எடுத்து சென்று தகனம் செய்தனர்.
